Жолаушылар тасымалының сапасы артты

Жаңалықтар

Павлодарға кейінгі екі жылда жаңа автобустар үсті-үстіне әкелініп жатыр. Қоғамдық көлікті жаңарту, тасымал саласына субсидиялауды енгізу өз нәтижесін беріп, бүгінде қала ішіндегі жолаушылар тасымалының сапасы арта бастағаны байқалады.

Жуырда облыс орта­­лы­­ғындағы «Пав­лодар авто­ком­­бинаты» ЖШС «Yutong» мар­­­калы жаңа 20 автобуспен толық­ты. Әр автобустағы отыратын орындар саны – 35, жалпы сыйымдылығы – 93 адам. Жолау­шы­ларға ыңғайлы болу үшін көліктер пандустармен, ауа бап­та­ғыштармен, радиаторлармен жаб­дықталған. Осылайша, серіктестік жолаушылардың алғы­сына бөленіп жатыр.

– Жаңа автобустар №1, №1Э бағыт­тарына шығады. 2024 жылы әкелінген 20 автобус №2, №9 бағыттарына қайта бөлінеді. Бүгінгі таңда автокомбинат желісінде 55 автобус жұмыс істейді, оның 40-ы жаңа. Өңір билігі қоғамдық көліктің жұмысын жақсартумен үшінші жыл қатарынан жүйелі айналысып келеді. Субсидиялауды енгізу, электронды билет жү­йесін енгізу, жолаушылар ағы­нының ашық­тығын қам­тамасыз етудің арқа­сында айтар­лықтай нәтижелерге қол жет­кізілді, – деп хабарлады облыс әкімінің баспасөз қызметінен.

Кәсіпорын директоры Алек­сандр Панченконың айтуынша, күзге салым тағы 15 авто­бус сатып алып, оларды №18, №27 бағыттарға жіберетін ой­ла­ры бар. Осылайша, биыл та­сы­­­мал­даушының барлық алты ба­ғы­тын­дағы көліктер жаңар­тылады.

Тағы бір ірі тасымалдаушы – «№1 автобус паркі» ЖШС қала ішінен өнеркәсіптік ауданға кө­шіп, орналасқан жерін өз­герт­кен еді. Өңір басшысы Асайын Бай­ханов аталған кәсіпорынға барып, парктің жай-күйін зер­деледі. 1957 жылы негізі қалан­ған ком­панияның меншік иесі алдың­ғы жылы ауысып, инвес­тор екі жылдың ішінде тасы­малдау сапасын жақ­­сарту мақ­са­тында автопарк пен оның инфра­құ­рылымын жаңартуға шамамен 10 млрд теңге қаражат құйды.

Компания өкілдері аймақ басшысына жаңартылған автобус паркін көрсетіп, жүргізуші­нің Face ID арқылы кәсіпорынға кіруінен бастап маршрутқа шығуына дейінгі толық жұмыс циклі туралы баяндады. Дис­петчерлік, медициналық ка­би­неттің жұмысымен таныс­тырды. Сондай-ақ әкім күн са­йын 4-5-санаттағы механиктер мен слесарьлар бригадасы жұмыс істейтін жөндеу аймағында болды. Кәсіпорында заманауи­ автоматтандырыл­ған жуу, май ауыстыру, кең бокстар, мен­шікті жанармай құю беке­ті жабдықталған. Жүр­гізу­­­шілерге демалатын орын, тамақ ішетін, киім ауыстыратын, жуынатын, кір жуатын бөл­ме­лер қарастырылған. Бүгін­де кәсіпорынның 20 автобус бағытында 260 жүргізуші жұмыс істейді. Автопаркте 2023–2024 жылдары шығарылған 130 автобус, 2019 жылғы 30 автобус бар.

«Әлеуметтік маңызы бар жолаушылар тасымалына бағыт­талған субсидиялардың бизнес­тен кетпей, кәсіп­орын­ды дамыту үшін қайта инвес­ти­ция­ланғанына қуаныштымын», деп атап өтті облыс әкімі.

Құрылтайшының айтуынша, автопарк қала сыртына көшу­ден ұтылмаған. Бұрынғы автопарк тұрғын үйлердің дәл ортасын­да орналасқан еді. Қала тұр­ғын­дары автобустардың жин­а­луына, таңертең, кешкі уақыт­тарда көліктерден шыға­тын газдар мен шуға жиі шағым­данатын. Қазір ол құбылыс сап тыйылған.

«Жаңа база бұрынғыдан екі есе үлкен. Біз мамандандырыл­ған автопаркті жоспарлап, іске асырдық. 2025 жылдың жос­парында қосымша 20 автобус сатып алу, шатырды, кірме торапты ауыстыру, ғимараттың екінші, үшінші қабаттарын жөндеу, аумақты асфальттау көзделіп отыр. Қысқасы, алдағы уақытта қызметкерлерімізге барынша қолайлы жағдай туды­ру­ды жалғастыра береміз. Бұл өз кезегінде жолаушылар тасы­малының сапасын одан әрі жақ­сартуға септігін тигі­зеді», деді №1 автопарктің құрыл­тай­шысы Ризван Цинаев.

Павлодар облысы