Өңірде тасқын су қауіп төндіріп тұрған елді мекендерден мал басын алдын ала эвакуациялау жүріп жатыр. Апат айтып келмейді, былтыр көктемде төтеннен келген телегей су талай малды жалмап кеткені белгілі. Өткен күннің ащы сабағы биыл Төтенше жағдай қызметі мен жергілікті атқарушы билік өкілдерін ертерек қамдануға мәжбүрлеп отыр.
Тиісті орындар қызыл су қыспаққа алған жағдайда ауылшаруашылық шығындарының алдын алатын, төрт түліктің қауіпсіздігін қамтамасыз ететін арнайы эвакуация орындарының картасын әзірлеп қойды. Аталған картада қауіпсіз тұрақтардың орны қай жерде, оған неше мал сыяды, малды қалай айдап апару керек, су құрсауында қалған төрт түлікке жемшөп қайтіп жеткізіледі деген мәселелерге дейін нақтыланған.
Ақпараттық штабтың мәліметінше, бүгінге дейін былтыр алапат тасқын болған аймақтардағы малдың дені эвакуацияланған. Мәселен, Арқалық қаласына қарасты Екідің, Қайыңды, Әбдіғапар хан, Жалғызтал елді мекендеріндегі 14 шаруа қожалығының малы қауіпсіз жерлерге көшірілген. Амангелді ауданында 77 қожалыққа қарасты 43 қыстақ пен Үрпек, Қабырға, Құмкешу ауылдарындағы мал түгелдей қауіпсіз аймаққа шығарылды. Қалған 34 қожалықтың малы жақын күндері көшірілмек.
Жергілікті атқарушы органдар мен ТЖД өкілдері мал иелеріне қауіпті жағдайдың жөнін түсіндіріп, мал тұрағына арналған уақытша орындарды дайындау, жемшөп қорымен қамтамасыз ету сияқты кешенді дайындық жұмыстарын ойдағыдай атқарып шықты.
Сонымен қатар шалғайда жатқан Жангелдин ауданында да су тасқыны қаупі бар аймақтар жіті зерттелді. Нәтижесінде, қауіпті аймақта орналасқан 41 шаруа қожалығы анықталып, бұл жөнінде жергілікті тұрғындар хабардар етілді. Бүгінге дейін 13 қожалықтың малы қауіпсіз жерге көшірілді.
Қостанай облысы