Ұялы байланыс операторлары күдікке ілінді: тарифтерді көтеру бойынша тексеріледі

Жаңалықтар

Монополияға қарсы комитет қазақстандық ұялы байланыс операторларының тарифтерді белгілеуде алдын ала сөз байласуы мүмкіндігіне қатысты тексеруді бастады.

Бұл туралы Мәжіліс кулуарында Бәсекелестікті қорғау және дамыту агенттігі (БҚДА) төрағасының орынбасары Болат Сәмбетов айтты, деп хабарлайды inbusiness.kz сайты LS-ке сілтеме жасап.

Оның айтуынша, соңғы жылдары ұялы байланыс құны тұрақты түрде өсіп келеді, әрі барлық операторларда бірдей уақытта, бұл агенттіктің күдігін туғызған.

"Қазіргі уақытта біз жағдайды егжей-тегжейлі зерттеп, сөз байласу фактісін тексеріп жатырмыз. Сонымен қатар, нарықта монополиялық жоғары тарифтерді белгілейтін оператор болуы мүмкін. Сол операторға қатысты жеке тергеу басталуы ықтимал", — деді Сәмбетов.

Монополияға қарсы органдар бағаның көтерілу негізділігін немесе жосықсыз бәсекеге қатыстылығын анықтау үшін жағдайды талдауды бастаған.