Мәжіліс депутаты Асылбек Нұралин елордада жұмыс күнінің басталу уақытын сағат 9:00-ден 7:00-ге ауыстыруды ұсынды. Бұл бастама мемлекеттік қызметкерлер мен қаладағы жалпы көлік қозғалысын оңтайландыру мақсатында көтеріліп отыр
Бұл туралы Caravan.kz медиа порталы baq.kz-ке сілтеме жасап хабарлайды.
Астана қаласында жұмыс істейтіндердің 50%-дан астамы мемлекеттік мекемелерде еңбек етеді. Осыған байланысты орталық атқарушы органдардың, ұлттық компаниялар мен ведомстволық бағынысты ұйымдардың қызметкерлеріне қатысты көлік ағынын қайта қарау керек, — деді депутат Мәжілістің жалпы отырысында.
Қоғамдық көлік пен жолдағы жүктеме – басты мәселе
Депутаттың айтуынша, таңғы 8:00 бен 9:00 аралығында елорда көшелерінде көлік тығыздығы күрт артады. Бұл уақытта мемлекеттік қызметкерлер, жеке сектор өкілдері, оқушылар мен студенттер барлығы бір мезетте жолға шығады. Нәтижесінде жолда кептеліс, қоғамдық көлікте лық толы жағдай туындайды.
Егер жұмыс уақыты сағат 7:00-де басталса, бұл қаладағы қозғалысты біршама ретке келтіріп, азаматтардың жолға кететін уақытын қысқартуға сеп болар еді, — дейді депутат.
Қоғам пікірі мен сарапшылар не дейді?
Аталған ұсыныс қоғамда қызу талқыланып жатыр. Бірі «Бұл бастама қала тынысын жеңілдетеді» десе, енді бірі «Тым ерте жұмыс істеу еңбек өнімділігіне кері әсер етеді» деп есептейді.
Сарапшылар пікірінше, мұндай өзгеріс мемлекеттік сектордан бөлек, білім беру, денсаулық сақтау саласына да әсер етуі мүмкін.
Сонымен қатар, еңбек кодексіне сәйкес, жұмыс уақытының өзгеруі үшін қосымша нормативтік құжаттар мен келісімдер қажет болуы мүмкін. Сондықтан бұл ұсыныстың нақты іске асуы бірнеше кезеңнен тұратын процесті талап етеді.
Ескерте кетейік, бұл тек депутаттық ұсыныс. Жұмыс уақытының өзгерісі әзірге қабылданған шешім емес. Қоғамдық талқылаудан соң тиісті органдар мәселені қарауы мүмкін.