Маңғыстауда өңірдің мақамы бөлек жырын, әуені өзге әні мен күмбірі ерен күйін тумысынан бойына сіңіріп туып, есін біле қоңыр домбыраны серік етіп, сахнаның саңлағы және сәні атанып кететін өнердің өз адамдары бар. Айрықша өнерді нәсіп еткен өлкеге табиғат оның марқасқа өкілдерін де сыйлайтын тәрізді.
Олар тылсымнан мойнына жүктелген аманат-парызды қалтқысыз түсініп, мінсіз атқарып, шәкірт тәрбиелеп, кешеден келген, бүгін өзі ұстаған өнерді шәкірттері арқылы келешекке жалғайды. Өнердің ауыр жүгін арқалаған мүйізі қарағайдай азаматтар арасында бүрме көйлегі мен оюлы қамзолы көзге ұрып, сырғасы мен шолпысы сыңғырлап, Маңғыстаудың алтын шуағына маңдайын сүйгізіп, ерке самалына шашын сипатып, көк теңіз жағасында күлімдей өнер көрігін қыздырып жүрген қыздардың бірі – домбырашы, күйші, әнші Рухия Батыршиева.
Маңғыстау облысы Түпқараған ауданы Форт-Шевченко қаласында көпбалалы отбасында дүниеге келген Рухия орта мектепті бітірген соң Форт-Шевченко қалалық мәдениет және білім бөлімдерінде қызмет атқарды. Мәдениет үйі жанынан құрылған ұлт-аспаптар оркестрінің белді мүшесі және «Ақбөбек» арулар ансамблінде жетекшілік қызметте жүріп облыстық комсомол комитетінің жолдамасымен Болгария елінің төрт қаласында гастрольдік сапармен халықаралық фестивальға қатысып бас жүлде алып қайтты. Жеңіс қанаттандырған әрі өзінің тағдыры өнермен қабыса өрілетінін түсінген Рухия Алматыда қазіргі Ж.Елебеков атындағы өнер коледжінде профессор Құбыш Мұхитовтың класында домбыра аспабы бойынша білім ала жүріп, қосымша Қазақстанның Халық әртісі Ғарифолла Құрманғалиевтен дәстүрлі ән-терме бойынша сабақ алды. Өнерді сүйген қыз мұнымен тоқтап қалған жоқ, Алматы мемлекеттік Құрманғазы атындағы Ұлттық консерваторияда оқи жүріп, Академиялық Құрманғазы атындағы ұлт-аспаптар оркестрінің әртісі болып қызмет атқарды. Туған жерге кәсіби жоғары білімді маман болып оралған ол еңбек жолын Форт-Шевченко қаласы Мұрын жырау саз мектебінің директоры қызметінен бастады. Осы кезден бастап Рухия Махмұтқызы ұлттық өнерді насихаттау, жас өнерпаздарды тәрбиелеу ісінен ауытқып көрген жоқ. Ақтау қаласы өнер мектебінде бөлім меңгерушісі, Абыл Тарақұлы атындағы қазақ балалар өнер мектебінің директор қызметін жасай жүріп, 1992 жылы Маңғыстау облыстық филармониясы жанынан құрылған «Ақжарма» фольклорлық ансамблінің мүшесі және жеке орындаушысы, А.Тарақұлы атындағы ұлт асапаптар оркестрінде әртістік қызметін атқарды. Кейін аталған филармония директоры, сосын А.Тарақұлы атындағы қазақ балалар өнер мектебі директоры қызметін атқарды. Тек ұстаз ретінде еңбек етіп қоймай, қазақ өнерін дамыту жолында ерлермен бірге талай мәселе көтерді, талап етті, нәтижеге жетті. Ұлт өнерінің болашағы үшін Ақтау қаласынан қазақ балалар өнер мектебін ашу, ол мектепке Абыл Тарақұлының есімін берудің басы-қасында талай табалдырықты тоздырып, талай есікті қағып барғандардың бірі осы Рухия апамыз.
2018 жылы зейнетке шыққанмен ұлағатты ұстаздық жұмысынан қол үзген жоқ, дәулескер домбырашы, тәжірибелі ұстаздың жас өскінге берер рухани азығы мол екендігін білген басшылар қызметте қалдырды. Қазақстанның оқу ісінің үздігі, Қазақстанның еңбек сіңірген қайраткері, Ақтау қаласының құрметті азаматы, «Ерен еңбегі үшін» медалінің иегері Рухия Махмұтқызының шәкірттері бүгінде еліміздің әр түкпірінде өнер сапында жүр, колледж, консерватория бітіріп, кәсіби маман ретінде өнер ордаларында жұмыс істеп, оқу орындарында шәкірттерге білім беріп жүргендері қаншама? Ұстаз мұраты, өнер сабақтастығы деген осы болса керек. Бұл тұрғыдан келгенде Рухия өзіне табиғаттан берілген аманат-парызды орындады деп білеміз. Шәкіртінің бірі – дәстүрлі әнші, домбырашы, Қазақстанның еңбек сіңірген қайраткері, «Дарын» Мемлекеттік жастар сыйлығының лауреаты, «Құрмет» орденінің иегері, Қазақ ұлттық университетінің профессоры, мәдениет саласындағы Президент стипендиясының иегері Айгүл Қосанова. Рухия Айгүл шәкіртін мақтанышпен айтып жүреді.
Жаны жайсаң, қарапайым, әрдайым күлімдеп, жан-жағына жылу шашып жүретін әнші, домбырашы Рухия – отбасында аяулы ана, асыл әже. Ұлы Бақытжан мұнай саласында еңбек етсе, кіші ұлы Алмас өзі сияқты қоңыр домбыраны құйқылжытқан дәулескер домбырашы, қаршадайынан күй додаларында топ жарған жүйрік, Ұлттық консерватория түлегі. Шаттығы шалқыған отбасында немерелерін қызықтап, қоғамда ұлттық өнерді насихаттап жүрген Рухия Махмұтқызы халыққа шығармашылық әрі есептік концертін беріп, көрерменге әсерлі де әдемі кеш сыйлайтыны сөзсіз.
Маңғыстау облысы