Түркістан облысында «Таза Қазақстан» бағдарламасы аясында 7 263 тазалық іс-шарасы жоспарланған. Оның ішінде көктемгі ағаш егу, көгалдандыру, тазалау жұмысы қарқынды жүргізіліп жатыр. Нақтылай айтсақ, қала мен ауыл көшелерін тазалауға 739 арнайы техника жұмылдырылып, 129 672 тұрғын белсенділік танытты. Нәтижесінде, 201 375 көшет отырғызылып, 2 709 тонна қоқыс шығарылды.
Жалпы, өңірде биыл 1,2 млн ағаш отырғызу, оның ішінде 631 түп ағашты көктем мезгілінде отырғызу жоспарланған. Ақпанның аяғында басталған жұмыс нәтижесінде отырғызылған 200 мыңнан астам ағаш су жүйесімен қамтамасыз етіліп, қоршау жасалды.
Облыс әкімі Нұралхан Көшеровтің төрағалығымен өткен аппарат мәжілісінде «TazaQazBot» ақпараттық жүйесіне түскен 1 527 өтінімнің 1 505-і орындалғаны мәлім етілді. Биыл қоғамдық орындарда санитарлық талаптарды сақтамағандарға 4 487 хаттама толтырылған. Барлық аудан, қала әкімдіктері, мемлекеттік коммуналдық кәсіпорындардың тиісті құжаттарына қатты тұрмыстық қалдықтарды жинау, шығару мәселесі жөнінде толықтай өзгерістер енгізілген. Наурыз айында өткізілетін мерекелік бағдарламаларда тазалыққа, көгалдандыру жұмысына да ерекше мән беріледі. Мысалы, Сайрам ауданында «Жасыл желек» іс-шарасында 12 мыңнан аса ағаш көшеті отырғызылды. Облыстық табиғи ресурстар және табиғат пайдалануды реттеу басқармасы Сайрам ауданы бойынша бекіткен, 2023–2025 жылдарға арналған елді мекендерді көгалдандырудың іс-шара жоспарына сәйкес, биыл көктемде 23 300 түп көшет отырғызу жоспарланған.
Облыста биылғы жоспарға сәйкес, елді мекендерге 1 млн-нан астам көшет үлестіру көзделген. Бүгінде 206 375 түп көшет аудан-қала әкімдіктеріне жөнелтілген. Табиғи ресурстар және табиғат пайдалануды реттеу басқармасының басшысы Қайрат Әбдуалиевтің мәлімдеуінше, өңірде 3 млн 472 мың гектарды құрайтын мемлекеттік орман қоры бар.
«Мемлекет басшысының «Жаңа жағдайдағы Қазақстан: іс-қимыл кезеңі» атты Жолдауында республика көлемінде 2 млрд ағаш отырғызуды тапсырған болатын. Тапсырмаға сәйкес, облыстың орман қоры жерлеріне 2021–2027 жылдары 110 мың гектарға 170 млн көшет егу жұмысына қатысты арнайы кешенді жоспар бекітілген. Сол жоспарға сәйкес, 2021–2024 жылдар аралығында 79 мың гектар жерге 117 млн түп көшет егілді. 2025–2027 жылдары аралығында қалған 31 мың гектар жерге 53 млн түп көшет егу жұмысы толығымен жүргізіледі. Өткен жылы орман шаруашылығы мекемелерінде жалпы көлемі 343 гектарды құрайтын 24 орман тұқымбағында 30 млн-ға жуық көшет өсіріліп, 10 млн-нан астам көшет егілді», деді басқарма басшысы.
«Отырар орман және жануарлар әлемін қорғау жөніндегі мемлекеттік мекемесіндегі» тұқымбақта өсірілген көшеттер Түркістан, Арыс қалалары мен Отырар аудандарын көшетпен қамтып отыр. Он гектар алқапты алып жатқан Қоғам ауылындағы тұрақты тұқымбақта қарағаш, өрік, үйеңкі, шаған, жиде, қылқан жапырақты тағы басқа ағаш түрлері өсіріледі. Тұқымбақты дамыту мақсатында биыл гүлді, сирек кездесетін сәндік ағаштарды өсіру көзделіп отыр. Мекеме тұқымбағынан аудан, қала елді мекендерін көгалдандыру жұмыстарына өткен жылдың күз мезгілінде 117 820 түп ағаш-бұта көшеті босатылды. Сондай-ақ тұқымбақта тазалық шаралары қарқынды жүргізіліп келеді. «Таза Қазақстан» бағдарламасы аясында сенбіліктер ұйымдастырылып, орманшылар тұқымбақ аумағында ретсіз өскен шөптерді жұлып, қураған талдарды бұталап, ағаш түптерін әктеп жатыр. Жалпы, жыл сайын орманшылар тұқымбақты тазалап, жасыл желектерді көктем-күз айларында босатуға дайындайды.
Түркістан облысы