Халық айтысқа әбден сусапты. Әйгілі жазушы Қалихан Ысқақтың 90 жылдығына орай Өскеменде өткен жыр додасына жиналған жұртта қисап болмады. Облыстық филармонияның 700 орындық залы лық толды. Ішке сыймаған жұрт тыста тұрып тыңдады. Көрермен қол соғып, қиқу қосқанда ақындар да арқалана түскен. Иә, бұл күні айтыс сүйер қауымның айызы бір қанды.
Биыл Шығыстан шыққан қос қаламгер – Қалихан Ысқақ пен Дидахмет Әшімханұлының мерейтойлары. Осы атаулы күндерге арналған іс-шаралар легі ақын Ақтан Нұрбаев атындағы ақындар мектебінің ашылуымен басталды. Ақтан Нұрбаев ақын кеңес кезеңінде өңірімізде айтыс өнерін дамытуға атсалысқан еді. Жазған өлеңдері де өріліп түскен, мағынасы терең. Ақын атындағы мектеп айтыс өнеріне ден қойған дарынды жастардың басын қосып, бағыт-бағдар беріп, таланттарын шыңдауды мақсат еткен. Лентасын айтыстың атасы Жүрсін Ерман, ақын Ұлықбек Есдәулет, жазушы Әлібек Қаңтарбай қиған соң жаңа орта ілгері басып, іргелі мектепке айналуға тиіс те. Бұл іс-шарадан соң құрметті қонақтар айтысқа асыққан. Кең сарайдың ішінен ине шаншыр орын таппаған көрермен сыртқа жайғасып, айтыс тыңдауға ыңғайланыпты. Алайда орынның болмағанына ешкім қабақ шытпады. Керісінше рухани кешке халықтың көптеп жиналғаны қуантты.
Айтыс ә деп басталғанда-ақ тыңдарманды ұйытып әкетті. Ақындар бір-бірімен тістесіп, әзілдесіп, жыр шумақтарын төккенде көрермен «бәрекелді» десіп, қолпаштап отырды. Өңірдің мәселелерін де түйреп өтті. Рүстем Қайыртай облыстық драма театрға Қалихан Ысқақтың атын беру керек деп бір орап өтсе, жазушының ауылында ауызсудың жоқтығын айтып, бір түйреді.
Айтыс кешке дейін жалғасты. Орын алып үлгермеген көрермен сол қалпы тікесінен тік тұрып тамашалады. Қандай мега жұлдыз келіп өнер көрсетсе, соңына дейін шыдамас еді ел. Бұл дегеніміз төл өнердің құдіреті дерсіз. Сөйтіп, айтыстың бас бәйгесі жергілікті ақын Серік Қуанғанға бұйырса, бірінші орынды Рүстем Қайыртай еншілеп, Алтын домбыраға жолдама алды. Екінші орынды Аспанбек Шұғатаев пен Иранғайып Күзенбаев алды. Ал үшінші орын Жансая Мусина мен Біржан Байтуовқа берілді.
Жазушыларға арналған рухани іс-шаралардың бұл – басы. Дүбірлі той жаздың күні туған жерлерінде жалғасын табады.
Өскемен