Ұлттық музейде Музей педагогикасы және балалар шығармашылығы бөлімінің ұйымдастыруымен «Тарихи тұлғалар» жобасы аясында Халық жазушысы Мұхтар Мағауиннің 85 жылдығына орай «Тарихтан тағылым тартқан» атты музейлік дәріс өтті.
Кезекті музейлік дәріс қазақтың өшкенін жаңғыртып, тарихын қалыптаған дарын иесі Мұхтар Мағауиннің шығармашылығына арналды. Тарихи роман жанрының дамуына ықпал еткен тау тұлғаның прозалық шығармаларына тоқталып, оны жастарға насихаттап, білім қорын жетілдіру мақсатында өткен іс-шара жазушының рухы ешқашан өлмейтінін білдірді.
Әдеби басқосуға «Túrkistan» газетінің бас редакторының орынбасары Тоқтарәлі Таңжарық, «Alqa» әдеби-мәдени клубының жетекшісі, мәдениеттанушы Жанар Таңсық, М.Жұмабаев атындағы халықаралық колледж студенттері, А.Құнанбайұлы атындағы №87 мектеп-гимназиясының оқушылары қатысты.
Алқалы жиын көрнекті қаламгердің жазып кеткен тарихи мұраларын талдап, түсініп, ұрпақ жадына сіңіру, ғибратты ғұмырын кейінге жеткізуді мақсат етеді. Дәріскерлер жазушының тарихи еңбектеріне тоқталып, романдарына талдау жасады. Сондай-ақ іс-шара барысында қаламгердің өмірі мен қызметі баяндалған бейнесюжет ұсынылып, талантты жастардың орындауында күй тартылды. Қатысушылар тарапынан жазушының шығармаларына қатысты сұрақтар қойылып, іс-шара марапаттау рәсімімен аяқталды. Алғысхаттар табысталып, дәріскерлер жастарға ақжарма тілегін білдірді.