Азаматтық авиация комитеті қазақстандық әуе компаниялары Airbus ұшақтарының бағдарламалық жасақтамаларын 29 қарашаның соңына дейін жаңартып бітіруді жоспарлап отырғанын мәлімдеді, деп хабарлайды KAZ.NUR.KZ.
Комитеттің ресми Telegram-каналында хабарланғандай, 29 қараша таңертеңгі жағдай бойынша Air Astana компаниясының инженерлік қызметі EASA шығарған шұғыл ұшуға жарамдылық директивасына сәйкес 18 Air Astana және FlyArystan ұшақтарындағы бағдарламалық жасақтаманы жаңартуды сәтті аяқтады.
"Бағдарламалық жасақтаманы жаңарту 2025 жылғы 29 қарашаға дейін аяқталады деп жоспарланып отыр. Қазіргі уақытта Air Astana және FlyArystan тобында 38 Airbus ұшағы ұшып жүр. Оның бесеуіне жаңарту қажет емес. Үшеуі Ақтауда, төртеуі Астанада және алтауы Алматыда орындалады. Жоспарлы немесе жоспардан тыс техникалық қызмет көрсетуден өтіп жатқан ұшақтар үшін бұл директива тиісті техникалық қызмет көрсету аяқталғанға дейін орындалады деп жоспарлануда", — делінген комитет хабарламасында.
Астана және Алматы халықаралық әуежайлары қазіргі уақытта қалыпты жұмыс істеп тұр, рейстер орындалып жатыр.
Комитет өкілдері жолаушыларға әуе компанияларының веб-сайттарында рейстерінің ағымдағы мәртебесін алдын ала тексеруді ұсынды.
Айта кетсек, төтенше ұшуға жарамдылық туралы директиваны Еуропалық авиация қауіпсіздігі агенттігі (EASA) 2025 жылдың 28 қарашасында шығарды және 2025 жылдың 29 қарашасында күшіне енді.
"A320 ұшағындағы мәселе бүкіл әлем бойынша шамамен 6000 ұшаққа әсер етті. Директива дереу және міндетті болып табылады. Ол күшіне енген сәттен бастап Airbus A319/A320/A321 барлық әуе кемесін пайдаланушылар келесі ұшуға дейін Airbus нұсқауларына сәйкес биіктікті басқару блоктарының бағдарламалық жасақтамасын ауыстыруға немесе өзгертуге міндетті.
Осыған байланысты, Air Astana және FlyArystan компаниялары басқаратын Airbus ұшақтарының ұшулары ұшу қауіпсіздігін қамтамасыз ету үшін міндетті жаңартуларды жүргізу мақсатында базалық әуежайларында кейінге қалдырылды", — деп қосты комитет өкілдері.
Еске салсақ бұған дейін бағдарламалық жасақтаманың жаңартылуына байланысты Airbus ұшағының рейстері кідіретіні хабарланған болатын.
Мәтіннен қате тапсаңыз, бізге жазыңыз