Ақтау әуежайының экскалаторында жарақат алған баланың анасы әуежай басшылығынан 2 млн теңге моральдық шығын талап етті. Сот оның талабын қанағаттандырып, әуежайды өтемақы төлеуге міндеттеді, деп хабарлайды KAZ.NUR.KZ Жоғарғы соттың баспасөз қызметіне сілтеме жасап.
Жоғарғы сот мәліметінше, 2024 жылдың жазында елорда тұрғыны кәмелетке толмаған екі баласымен Астанадан Ақтауға ұшып барған.
Олар ғимараттың жолаушылар терминалынан шыққаннан кейін балалардың бірі – екі жасар қыз шығу есіктері арқылы әуежайға жалғыз өзі қайта кірген.
Бала әуежай ғимаратының ішінде қозғалатын эскалатор механизміне қолын қойып қалып, саусағын жарақаттап алған. Қыз балалар ауруханасында емделген. Дәрігерлердің қорытындысы бойынша, оған 10 жасқа толғанда саусақты түзету отасын жасау қажет болады.
Жәбірленушінің анасы моральдық шығынды әуежайдан өтеуді талап етіп, сотқа жүгінген.
Әуежай өкілі бұл талаппен келіспейтінін, жазатайым оқиға әуежай қызметкерлерінің кінәсінен емес, баланың эскалаторға өз бетінше жақындап, жарақат алуынан болғанын атап айтқан.
Алайда сотта көрсетілген видеода әуежай инспекторы ғимаратқа шығу есіктері арқылы қайта кірген баланың қолын ұстағаны, бірақ оның соңынан ілеспек болған анасының көңілін аулап, оны босатқаны анықталған. Инспектор әйелді әуежай ғимаратына кіргізбей, баланы қараусыз қалдырған, қыз бала эскалатормен көтеріліп, сол жерде жарақат алған.
Сот жазатайым оқиғаға әуежай қызметкерінің кінәсінен орын алған деген қорытындыға келген, себебі ол кішкентай бүлдіршіннің терминал ғимаратына үлкендердің ертіп жүруінсіз кіруіне жол берген.
"Әуежайдың кінәсін жоққа шығаратын ешқандай дәлел келтірілмеген. Инспектордың кінәсі оның еңбек құжаттарымен: еңбек шартымен, жұмысқа қабылдау туралы бұйрықтан үзінді көшірмемен, тәртіптік жаза қолдану туралы бұйрықпен, сондай-ақ рұқсатты бақылау мен ішкі шаруашылық тәртіп ережелерінің сақталуын бақылау жауапкершілігін қарастыратын лауазымдық нұсқаулықпен расталады", — делінген хабарламада.
Сот анықталған мән-жайларды негізге ала отырып, әуежайды баланың заңды өкіліне моральдық шығын ретінде өтемақы ретінде 2 млн теңге төлеуге міндеттеді.
Шешім заңды күшіне енді.
Мәтіннен қате тапсаңыз, бізге жазыңыз