Мемлекет басшысының тапсырмасы бойынша Қызылорда облысындағы ауылдарды сумен қамтуға қайтарылған активтер қаражаты есебінен 2,2 млрд теңге бөлінді, деп хабарлайды KAZ.NUR.KZ үкіметтің баспасөз қызметіне сілтеме жасап.
Үкіметтің баспасөз қызметінің хабарлауынша, арнаулы мемлекеттік қордан Қызылорда облысында алты сумен жабдықтау нысанын салу жобаларын жүзеге асыруға 2,2 млрд теңге бөлінді.
Жобалар жалпы 1,8 мыңға жуық тұрғыны бар Арал және Қазалы аудандарындағы ауылдарды қамтиды. Аталған шараларды жүзеге асыру Тастүбек, Ерімбетжаға, Шәкен, Шилі, Шитүбек және Сарбұлақ ауылдарын сапалы сумен қамтамасыз етуге мүмкіндік береді. Жұмысқа топтық сумен жабдықтау жүйелеріне қосу да, ауылшілік желілерді салу да кіреді. Мердігерлік ұйымдар анықталып, жоба қаржыландырылды.
Нысандар құрылысын аяқтау және оларды пайдалануға беру 2025 жылдың соңына жоспарланған.
Мәтіннен қате тапсаңыз, бізге жазыңыз