Іздеу жұмыстарының үшінші күні жасөспірімді полиция қызметкерлері Александр Исаев Ермек пен Қуаныш Акемеев қаңырап қалған ғимараттардың бірінен тапты.
Жасөспірімнің жоғалғаны туралы хабар түскен бойда, Шығыс Қазақстан облысының полицейлері жедел түрде ауқымды іздестіру шараларын ұйымдастырды. Қала мен оның айналасын, су қоймаларының жағалауын, қаңырап бос қалған және иесіз ғимараттарды, орман алқаптарын тінту жұмыстарына 500-ден астам полиция қызметкері тәулік бойы жұмылдырылды, деп хабарлайды inbusiness.kz сайты ІІМ баспасөз қызметіне сілтеме жасап.
– 15 жастағы Александр Коверзин 9 маусымнан бері із-түзсіз жоғалғандардың қатарында болған. Қуанышқа орай, ол аман-есен табылып, қазіргі уақытта туыстарына тапсырылды. Жасөспірімнің өмірі мен денсаулығына ешқандай қауіп жоқ, – делінген ведомство хабарламасында.
Іздеу жұмыстарына тәртіп сақшыларымен қатар, құтқарушылар, әскери қызметшілер, қызметтік иттері бар кинологтар мен дрондар тартылды.
Іс барысында азаматтардың белсенділігі де маңызды рөл атқарды: жергілікті тұрғындардың бірі әлеуметтік желілердегі бағдар арқылы ұқсас жасөспірімді көргенін айтып, шамамен жүрген орнын көрсеткен.
– Жасөспірімнің айтуынша, ол үйінен әдейі шығып кеткен және біраз уақыт жалғыз болғысы келген. Осы уақыт ішінде ол жалғыз өзі иесіз ғимаратта болған. Қуанышқа орай, оның денсаулығына зиян келген жоқ. Бала анасына тапсырылды. Жасөспіріммен және оның заңды өкілдерімен осындай жағдайларға жол бермеу мақсатында профилактикалық әңгіме жүргізілді, – делінген хабарламада.
Полиция ата-аналар мен қамқоршыларды жасөспірімдердің көңіл-күйіне көбірек назар аударуға және олармен сенімді қарым-қатынаста болуға шақырады.
Полиция іздестіру жұмыстарына атсалысқан барлық азаматқа үлкен алғыс білдіреді.
Қоғамның қолдауы мен барлық қызметтердің үйлесімді әрекетінің арқасында қайғылы жағдайдың алдын алып, баланы отбасына аман-есен қайтару мүмкін болды.