Астанада Эколог күні мен Қоршаған ортаны қорғаудың бүкіләлемдік күніне арналған флешмоб өтті. Іс-шара «Таза Қазақстан. Астана – тазалық пен тәртіптің үлгісі » атты ауқымды экологиялық акция аясында ұйымдастырылды, деп хабарлайды El.kz ақпарат агенттігі.
Ерекше флешмоб «Астана-Арена» стадионында өтті. Бүгін оны Қазақстан мен Андорра ұлттық құрамалары арасындағы жолдастық матчтың үзілісінде футбол жанкүйерлері тамашалады.
Қала әкімдігінің мәліметінше, флешмобқа 300-ден астам адам – студенттер, еріктілер мен белсенділер қатысты. Олар экологиялық мәдениеттің маңыздылығын және қоршаған ортаға ұқыпты қараудың қажеттілігін еске салу үшін бірікті. «Таза Қазақстан» жазуы бар брендтік футболкалар киген жастар әсерлі хореографиялық қойылым көрсетті.
Димаш Құдайбергеннің «Tau Ishinde» музыкалық шығармасы сүйемелдеуімен жастар синхронды би қойылымын орындап, оның шарықтау шегінде алаңда «Таза Қазақстан» деген тірі жазу қалыптастырды. Сонымен қатар трибунада дәл осындай жазуы бар 10×15 метрлік алып тумен көрініс толықты. Экологиялық бастаманы қолдау ретінде жанкүйерлер Қазақстан Республикасының мемлекеттік туын көтерді. Флешмоб арқылы жастар қарапайым, бірақ маңызды қағидаларды еске салды: қоқыс тастамау, табиғатты аялау, қоршаған ортаға қамқорлық танытатын адамдардың еңбегіне құрметпен қарау.
Матч аяқталған соң көрермендер трибуналарды қоқыстан тазалап, көпшілік іс-шараларда тазалықты сақтауға деген ұмтылысты көрсетті. Бұл іске «Астана жастары» КММ-нің еріктілері мен белсенділері ғана емес, сондай-ақ Астананың бейжай қарамайтын тұрғындары да атсалысты.
Бұл елордада тазалық мәдениетінің қалыпты өмір салтына айналып келе жатқанын айқын көрсетеді. Нағыз экологиялық қоғам дәл осындай әрекеттерден басталады, – деді көрермендердің бірі.
Посмотреть эту публикацию в Instagram
Публикация от ASTANA (@akimat__astana)