Хайп пен лайк іздеген тараздық блогердің бейнеролик түсірмек әрекетін полиция қызметкерлері тоқтатты, деп хабарлайды Egemen.kz.
Облыстық полиция департаментінің баспасөз қызметі таратқан дерекке сенсек, әлеуметтік желілерді бақылау кезінде полицейлер қаланың орталық көшелерінің бірінде қауіпті маневрлер жасап, өзіне ғана емес, айналасындағыларға да қауіп төндіретін бейнетүсірілімді анықтаған. Белгілі болғандай, жас жігіт басқалардың қауіпсіздігін елемей, өз парақшасына «контент» түсірген.
Полиция қызметкерлері едел-жедел іске кірісіп, жүргізушінің кім екенін анықтап, оны жауапқа тартты. Құқық бұзушыға қатысты қарсы жолаққа шыққаны, жол жамылғысын зақымдағаны және маневр жасау ережелерін бұзғаны үшін әкімшілік хаттамалар толтырылған.Сонымен қатар, блогер 6 айға көлік құралын басқару құқығынан айырылды. Автокөлік айып тұрағына қойылды.