Орал қаласының жаңадан салынып жатқан Ақжайық шағын ауданында 120 пәтерлік үй пайдалануға берілді.
Наурыз мерекесі қарсаңында баспаналы болған тұрғындарға пәтер кілтін Батыс Қазақстан облысының әкімі Нариман Төреғалиев табыс етті. Өңір басшысы қоныстой иелерін мерекемен құттықтап, азаматтарды қолжетімді баспанамен қамтамасыз ету Мемлекет басшысы Қасым-Жомарт Тоқаев қойған негізгі міндеттің бірі екенін атап өтті.
Облыс әкімі баспасөз қызметінің дерегінше, 2024 жылы Орал қаласында бюджет есебінен 628 пәтерлік бес көпқабатты тұрғын үй пайдалануға берілген. Сонымен бірге ауылдық жерлерде 805 тұрғын үй сатып алынып, тұрғындарға табысталған. Оған қоса былтырғы су тасқынынан зардап шеккендер үшін 900 үй жаңадан салынып, 2 мыңнан астам пәтер сатып алып берілген.
Н.Төреғалиев биыл облыста 19 көпқабатты тұрғын үйдің құрылысы аяқталатынын, бұл тағы 950 отбасыны баспанамен қамтамасыз ететінін айтты. Бұдан бөлек, республикалық бюджет есебінен әлеуметтік осал топтағы азаматтарға 205 пәтер сатып алу көзделіп отыр.
– Бүгін «Ақжайық» шағын ауданында 120 пәтерлік жаңа үйді пайдалануға беріп жатырмыз. Бұл Наурыз мейрамы қарсаңында жерлестеріміз үшін үлкен қуаныш. Мұнда барлығы 25 көпқабатты тұрғын үй салу жоспарланған. Қазіргі уақытта оның сегізінің құрылысы аяқталды. Жалпы, жыл соңына дейін бюджет қаражаты есебінен 1500-ден астам пәтер пайдалануға беріледі. Сондай-ақ үйлері қауіпті деп танылған тұрғындарға 180 пәтер сатып аламыз, – деді Н.Төреғалиев.
Орал қаласының күнбатысында бой көтеріп жатқан «Ақжайық» шағын ауданы қарқынды дамып келеді. Мұнда білім беру, денсаулық сақтау, мәдениет, спорт нысандарын салу да жоспарланған. 2024 жылдың соңында 150 орындық заманауи оңалту орталығы пайдалануға берілді. Болашақта да халықтың өмір сапасын арттыруға бағытталған жаңа әлеуметтік маңызы бар нысандардың құрылысы қолға алынбақ. Таяуда жаңа шағын ауданды қаланың өзге бөлігімен жалғайтын жаңа автобус бағыты іске қосылды.
Батыс Қазақстан облысы