Аты аңызға айналған америкалық боксшы Джордж Форман қайтыс болды — ол 76 жаста еді. Бұрынғы екі дүркін чемпионның қайтыс болғанын оның отбасы хабарлады, деп жазады TMZ басылымына сілтеме жасаған KAZ.NUR.KZ.
"Махаббаттарыңыз бен дұғаларыңыз үшін алғыс айтамыз әрі біздікі деп атау бақытын сыйлаған адамның ерекше өмірін құрметтей отырып, жанына тыныштық сұраймыз", — деді Джордж Форманның отбасы мәлімдемесінде.
Боксшының ресми сайтында оның 1949 жылы 10 қаңтарда дүниеге келгені жазылған. Ол әуесқой бокста жетістіктерге аз уақыт ішінде жеткен — Олимпиада чемпионы болу үшін оған небәрі 25 жекпе-жек қажет болды. Ол 1968 жылы Мехико қаласында Олимпиаданың алтын медалін жеңіп алды.
Содан кейін ол кәсіпқой боксқа көшуді шешті, 1969 жылы алғашқы дебюті өтті. Ал екі жылдан кейін ол WBA және WBC тұжырымдары бойынша №1 үміткер атанды.
1973 жылы Форман 35 нокаут жасай отырып, 37-0 есебімен мінсіз рекордқа ие болды.
Форман 1973 жылы 22 қаңтарда Кингстонда Джо Фрейзермен жекпе-жек өткізгенде ауыр салмақта әлем чемпионы атанды. Фрейзер жекпе-жекте фавориті болғанына қарамастан, Форман оны алты рет нокдаунға түсіріп, екінші раундта жеңіске жетті.
Екі сәтті жекпе-жектен кейін Форман тарихтағы ең атақты бокс жекпе-жектерінің біріне, "Джунглидегі тарсыл" атанып кеткен жекпе-жекке қатысты. Рингте екі аңыз кездесті: Джордж Форман мен Мұхаммед Әли.
Аты аңызға айналған жекпе-жек сегізінші раундта Әлидің жеңісімен аяқталды.
Форман рингке 1975 жылы оралып, бес рет жекпе-жек өткізді. Ал 1977 жылы ол Джимми Янгтан жеңілгеннен кейін зейнетке шығып, кейін діни қызметкер болғанын жариялады.
Қаржылай қиындықтарға байланысты боксшы 10 жылдан кейін рингке қайта оралды. Ал 1994 жылы Форман қайтадан әлем чемпионы атанды — ол кезде Форман 45 жаста еді. Джордж ақыры 1997 жылы бокстан толықтай кетеді.