Үміт отын тұтатты

Қосшы

Ұлттық құрылтайда Торғай еліне қатысты бірдеңе айтылып қала ма деп елеңдеп отырғанда Президент Қасым-Жомарт Тоқаевтың: «Осы тұста тағы бір маңызды инфрақұрылымдық жоба қолға алынатыны туралы жариялағым келеді. Мен үкіметке Астанадан Арқалық, Торғай және Ырғыз арқылы Транскаспий халықаралық көлік дәлізіне тура шығатын автокөлік жолының құрылысын бас­тауды тапсырдым. Жаңа күре жол орталық және батыс аймақтар арасын 560 шақырымға қысқартады. Бұл тұтас Торғай өңірінің дамуына серпін беретін ауқымды жоба» дегенін естіп риза болып қалдық.

Торғайдың ертеңіне алаң­дап отырған жандардың қуа­ны­­шында шек болған жоқ. Әлеу­меттік желі де жағымды жаңа­лық әп-сәтте тарап кетті. Со­ны­мен қатар одан әрі Арқалық қаласында әуежайды қалпына келтіру мен жаңа аэровокзал салу туралы бастаманы да ел ерек­ше қабылдады.

Сонау 90-жылдардың соңын­да жабылып қалып, кейін басқа облыстар ашылғанда әртүрлі себеппен Торғай облысы ашылмай қалғанда желдің өтінде, үміттің жетегінде жүрген ел азаматтары ғана емес, жалпы халық Президентке үмітпен қарап, бірнеше рет хат жазып еді.

Енді халық биылғы Алаш қайраткері М.Дулатұлының 140 жылдығы қарсаңында бір жаңалық болып қала ма деп отыр­ғанда, Мемлекет басшысының бүгінгі аузынан айтылған жаңалықты ел қуана қабылдап қана қоймай, бұл келешекте Торғай облысы ашылуының алғашқы іргетасының қалануы ма деген үмітте отыр.

Жалпы, еліміздің ішкі өңір­ле­рі­нің даму мүмкіндігін, әле­уетін айқындап арнайы бағ­дарламалар қабылдаса, түбе­гейлі өзгерістер жасалуына мүмкіндік туар еді. Торғай өңірі Қазақстанда ауыл шаруашылығын дамытуда сапалы астығы мен мал өсіру, ет дайындау хабы болуға толық мүмкіндігі бар. Жаңа жұмыс орындары ашылса, өңірге халық тұрақтап, көші-қон бәсеңдейді.

Сонымен қатар ел іргесіне келіп тұрған көгілдір отынның Торғайға тартылуы да елге үлкен демеу, жаңа экономикалық салалар мен бағыттардың қалып­та­суы­на мүмкіндік береді.

Құрманғали ДАРКЕНОВ,

Л.Н.Гумилев атындағы Еуразия ұлттық университетінің профессоры